Kuo maʻu ʻe he ʻEiki Sea ʻo e Fale Aleá, Lord Fakafanua, ʻi he ʻaho 2 ʻo Mē 2022 ʻa e ongo Tohi Fakamoʻoni ʻa e Fakamaauʻangá ʻo fakahā hono fakataʻeʻaongaʻi ʻi he Fakamaauʻanga Lahí ʻa e fili ʻo e Fakafofonga Fale Alea ʻo Tongatapu 10, Pohiva Tuʻiʻonetoa, kae pehē ki he Fakafofonga Fale Alea ʻo Tongatapu 7, Sione Sangster Saulala, ʻi he fili Fale Alea ne fakahoko ʻi he ʻaho 18 ʻo Novema 2021. Ko e ola eni ʻo e ongo hopo kehekehe ʻa Tuʻiʻonetoa mo Saulala ko e kole tuʻunga ʻi he fili (election petition), ʻi he hia ko e totongi ke fakalotoʻi (bribery).
Makatuʻunga ʻi hono fakataʻeʻaongaʻi ʻe he Fakamaauʻanga Lahí ʻa e fili ʻo e ongo Fakafofongá ni, ʻoku tuʻutuʻuni ʻe he Lao ki he Fili Fale Aleá kuo pau ke fakahifo (unseat) ʻe he Fale Aleá ʻa e ongo Fakafofongá ni mei hona takitaha sea ʻi he Fale Aleá. ʻE fakahoko ʻa e fakahifo ko iá ʻi he fakataha ʻa e Fale Aleá ʻe fakahoko ʻi he ʻaho 16 ʻo Mē 2022. Ka hili iá, ʻe lau leva kuo ʻatā ʻa e sea ʻo Tongatapu 10 mo Tongatapu 7 ʻi he Fale Aleá, pea ʻe tuku atu leva ʻe he ʻEiki Sea ʻo e Fale Aleá ki he Komisoni Filí ʻa e tohi fakangofua ke fili ha ongo Fakafofonga foʻou maʻa Tongatapu 10 mo Tongatapu 7. ʻE toki femahinoʻaki ʻa e ʻEiki Seá pea mo e Komisoni Filí ki he ʻaho ke fakahoko ai ʻa e fili ʻo e ongo Fakafofonga Fale Alea foʻou maʻae ongo Vahenga Filí ni.
Tuku Atu ʻi he Fakangofua ʻe he Kalake Pule ʻa e Fale Aleá
ʻAho 4 ʻo Mē 2022
ʻOfisi ʻo e Fale Alea ʻo Tonga, Nuku’alofa, Tonga
