Ke fakalotolahi’i mo faka’ai’ai ‘a e fānau fefine´ ‘oku ‘ikai ko e Fale Alea ´ma’ae kakai tangata pē, kā ki ha’a fafine foki, ko e ‘uhinga ia hono ‘ahia ‘e he Kulupu mei he Young Women Leadership Program ‘a e Fale Alea ‘o Tonga´ ‘i he ‘aho Falaite ko hono 17 ‘o Mē.
Na'e fakahā ‘e Vanesa Heletā ‘oku ne fakalele ‘a e polokalama ni ‘o pehē ko e konga eni ‘o e polokalama´ ke ako’i, fakalotolahi’i mo faka’ai’ai ‘a e kakai fefine´ ki he founga taki hotau fonua´.
Na'e talitali ‘a e kulupu ni ‘e he Kalake Le’ole’o´ Dr. Sione Vikilani pea mo e ‘Ofisa ‘oku tokoni ki he va’a ako ‘a e Fale Alea´ Siaosi Vete. Na’e fakahoko mo e ngaahi fakamatala fekau’aki mo e FaleAlea´ pea mo hono tali mo e ngaahi fehu’i mei he fānau ako ni. Na’e fakalotolahi’i ‘e Dr. SioneVikilani ‘a e fānau ako´ ke nau hoko ko ha kau taki lelei ‘i he kaha’u´ pea ke faka’ai’ai ke nau hoko ko ha kau Mēmipa Fale Alea ‘i he kaha’u´.
Ko e kulupu ko eni´ ko e fānau fefine ‘i he vaha’a 'o e ta'u motu'a ko e 18 ki he 25 mei Tongatapu, Vava’u, Ha’apai mo ‘Eua.
Ko e polokalama ako ko eni´ ‘oku fakahoko ia ‘i he uike ‘e tolu.