‘I hono tāpuni ‘o e taimi na’e faka’atā ke fakahoko ai ha fokotu’u kanititeiti ki he lakanga Palemiá ‘i he taimi 4.30pm ‘o e ‘aho ní, ko e fokotu’u ‘e ua kuo fakahū mai ki he ‘Ofisi ‘o e ‘Eiki Sea Fakataimi ‘o e Fale Aleá. Na’e fakahū mai ‘a e ‘uluaki fokotu’ú ‘i he ‘aho Monite 13 ‘o Tisema, pea fakahū mai ‘a e fokotu’u hono uá ‘i he ‘ahó ni. ‘E toki fakahā ‘a e ongo kanititeiti ki he lakanga Palemiá ‘i he fakataha ‘a e Hou’eiki Fakafofonga kuo filí ke fili ‘a e Palemiá, ‘a ia ‘e fakahoko ‘apongipongi, Pulelulu 15 ‘o Tisema ‘i he taimi 10am.
‘E fakamafola hangatonu atu ‘a e fakataha ‘a e Hou’eiki Fakafofonga Fale Alea kuo filí ‘i he ngaahi kautaha fakamafola lea fakalotofonuá, pea ‘e tuku atu hangatonu ‘i he opé (livestream) ‘i he Feisipuka mo e YouTube ‘a e Fale Aleá.
Tuku atu mei he
Kalake Pule ‘a e Fale Alea ‘o Tonga
‘Aho 14 ‘o Tisema 2021
